Лууль, шарилжны цэцгийн тоос агаарт дэгдэх хугацааны урьдчилсан мэдээ

Цаг агаар ургамлын цэцгийн тоос, түүний тархалтад чухал үүрэгтэй. Харшил үүсгэгч – агаар дахь ургамлын цэцгийн тоосны дэгдэж эхлэх, хамгийн их утгадаа хүрэх хугацааг урьдчилан мэдээлэх, тархалтыг зураглах нь ургамлын тоосонд өртөмхий, харшилтай хүмүүст түүнээс урьдчилан сэргийлэх, эрүүл мэндээ хамгаалахад тусалдаг.

Иймээс энэ жилийн бодит цаг агаарын, цаашдын цаг уурын урьдчилан мэдээнд тулгуурлан лууль, шарилжийн төрлийн ургамлын цэцгийн тоос агаарт дэгдэх хугацааны урьдчилсан мэдээг Цаг уур, орчны шинжилгээний газар боловсруулжээ.

Улаанбаатар, Дархан, Эрдэнэт хот, аймгийн төвүүдээр хугацааг тогтоон, ургамлын тоосонд өртөмхий, харшилтай хүмүүст түүнээс урьдчилан сэргийлэхийг зөвлөжээ.

• Завханы Улиастай, Увсын Улаангом, Баян-Өлгийн Өлгийд энэ сарын 20-ноос, 
• Архангайн Эрдэнэбулган, Хөвсгөлийн Мөрөн, Баянхонгор, Өвөрхангайн Арвайхээр, Говь-Алтайн Алтай, Ховдын Жаргалантад энэ сарын 30-наас 8 дугаар сарын 5 үед, 
• Сүхбаатарын Баруун-Урт, Хэнтийн Чингис, Дархан, Төвийн Зуунмод, Улаанбаатар, Эрдэнэт, Булган, Сэлэнгийн Сүхбаатарт ирэх сарын 8-наас 15-ны үед, 
• Дорноговийн Сайншанд, Өмнөговийн Даланзадгад, Дорнодын Чойбалсанд ирэх сарын 18-наас хойш цэцэглэж, цэцгийн тоосоо гөвөх төлөвтэй байна. 

Цэцэгт ургамлын тоосовчийн бөөгнөрлийг ургамлын тоос буюу эр бэлгийн эс гэнэ. Тоос хүртээгч шавжийг өөртөө татахын тулд цэцэгт ургамал олон жилийн хувьслын явцад маш амтлаг, тэжээллэг тоос гаргадаг. 

Дэлхийн эрүүл мэндийн байгууллагын (ДЭМБ) тооцоолсноор дэлхий дээр 400 сая хүн харшлын ринит (Хамрын ханын салст үрэвсэх), 300 сая хүн гуурсан хоолойн багтраагаар шаналж байна.

Шарилжийн цэцгийн тоос нь агаарт хэдэн мянган миль зайд тээвэрлэгдэх боломжтой. Шарилж лууль ургадаггүй газарт хүртэл шинж тэмдэг үүсгэх боломжтой байдаг. Европт шарилжийн цэцгийн тоос 2050 он гэхэд дөрөв дахин өсөх магадлалтай байна.

Агаараас ургамлын тоос уулын ойт хээрийн тойрогт судалсан дүнгээс үзэхэд, тус тойрогт агаарт тохиолдох ургамлын тоос улирал, сар, өдрөөр өөрчлөгдөж байв. Агаарт бургас, улиас, хус зэрэг мод сөөг зэрэг овог төрлийн тоосны мөхлөгүүд тодорхойлогдсон байна.

Ус цаг уур, орчны судалгаа мэдээллийн хүрээлэн, Хөдөө аж ахуйн цаг уурын судалгааны хэлтэс, Арьсны өвчин судлалын үндэсний төв